Ba mu yarda a hana shigo da motoci ba-Sanatoci

– Majalisar Dattawa ta nemi a kara duba maganar haramta shigo da motoci ta Kasa

– Yanzu babu damar shigo da motoci sai ta iyakar teku

– Majalisa ta nemi a saba wannan doka

Karshen shekarar can ne Gwamnatin Tarayyar Najeriya ta bada umarnin hana shigo da motoci fadin Kasar nan ta iyakar Kasa. Gwamnatin Kasar dai tace haramcin ya shafi sababbi da tsofaffin motoci zuwa cikin Kasar ta Najeriya kamar yadda Hukumar Kwastam ta sanar.

Sai dai Majalisar Dattawar Kasar tace ba ta aminta da wannan ba. Majalisar tace yin hakan zai sa mutane sama da 500,000 su rasa aikin yi. Sanatocin Kasar sun ce wannan doka ba za ta taimaki talaka ba. 

Sanata Barau Jibril na Jihar Kano ya kawo wannan kudiri, Danuwan sa Sanata Kabiru Gaya ya mara masa baya a kan haka. Haka nan sauran Sanatoci irin su Sanata Shehu Sani sun yi fata-fata da wannan doka. 

Sanotocin sun kuma nemi a janye wannan doka  cikin gaggawa. Majalisar dai ta kuma nemi ayi bincike game da batun tare da rokon Shugaban Kasa ya ji kukan Jama’a ya janye dokar.

[NAIJ Hausa]