Bai dace a hana shigo da motoci ba-Gudaji Kazaure

– Dan Majalisar nan, Hon. Gudaji Kazaure yace bai dace Gwamnati ta hana shigo da motoci ta iyakar Kasa ba

 

– Gudaji Kazaure yace wannan ya sabawa ka’idar Damukaradiyya gaba daya

 

– Daga karshen watan nan, babu damar shigo da motoci kowace iri sai ta iyakar teku

Kwastam ta han shigo da motoci: Gudaji Kazaure yace sam ba za ta yiwu ba..

Kwanan nan ne Gwamnatin Tarayyar Najeriya ta bada umarnin hana shigo da motoci fadin Kasar nan ta iyakar Kasa. Gwamnatin Kasar dai tace haramcin ya shafi sababbi da tsofaffin motoci zuwa cikin Kasar ta Najeriya kamar yadda Hukumar Kwastam ta sanar.

Sai dai Dan Majalisar nan mai wakiltar Yankin Jihar Jigawa yace hakan ya sabawa Damukaradiyya idan dai da gaske Gwamnatin ta Jama’a ce. Gudaji Kazaure yace mutane da dama ba su da halin sayen sababbin motoci daga Kasar Amurka da Japan.

Gudaji Kazaure ya bayyana bacin ran sa ne a Majalisa, yace idan aka kyale to jama’a da dama, musamman na Arewa za su rasa aikin yi. Dan Majalisan yace masu shigo da motoci ta Cotonou su kan biya kudin da doka ta sa a iyakar Jibia da Seme da ke Legas da Katsina.

Hukumar Kwastam dai tace daga Junairun shekara mai zuwa, babu damar shigo da motoci ta kan iyakar Kasa. Za a bari ne a rika shigo da motoci kawai ta iyakar ruwa.

[NAIJ Hausa]