An kashe wani Saurayi saboda Biredin N50

– An kashe wani Saurayi mai shekaru 22 saboda Biredi

– Wani Jami’in tsaron ne soka masa wuka

– Wannan abu ya faru ne a Jihar Bayelsa

Wani Sabon kurtum Soja ya kashe wani Saurayi a Jihar Bayelsa saboda Biredin N50. Wannan abu ya faru ne dai a farkon wannan makon a Unguwar da ake cewa Ozizebiri da ke Karamar Hukumar Kudancin Ijaw.

Wani kurtun Soja mai suna Ayibakare Oguo ya dabawa wannan Saurayi wuka bayan sun yi ‘yar rigima. Sojan ya yi wa Kanwar Marigayin shegen duka ne saboda Biredin N50. Bayan danuwan ya ga abin da ya faru, sai yayi kokarin kare kanwar ta sa, daga nan ne fada ya shiga tsakani.

Kafin ka ce mene dai har Sojan ya dabawa wannan Saurayi wuka, ya kuwa aika sa Lahira. Wannan abu dai ya kawo tashin hankali yanzu. Jaridar Punch tace an kona gidaje sama da uku a Yankin.

A Jiya Jumu’a da safe kuma, Mutanen Garin Zariya sun shiga cikin wani rikici. Jama’a da dama dai sun dauka fashi aka yi kokarin yi a Unguwar PZ. Inda aka samu takaddama har ta kai wani Jami’in Mobile ya shiga budawa wuta babu dalili.